eremit.dk
Sti: Forside > Emneindeks > KD > Bind I > nr.81

Kjøbenhavns Diplomatarium

Bind: I
Side: 119-122
Nummer: 81


<-Forrige . Indhold . Næste->

81.

2 Feb. 1382.

Skraa for det tydske Kompagni.

In godes namen amen. Nagodes bort mccc jare in deme Ixxxij iare in vnszer vrouwen dage to lichtmissen so hebben de koplüde van der Wysmer vnd van deme Sunde vnd van Stettyn vnd vort alle de gemeyne kopman vth den dudesschen steden to Copenhauen gemaket vte der selschop eyn boldek vnnd iiij lichte; weret dat dar storue eyn broder vte der selschop, den schal man begaen to Coppenhauen ofte wor he gestoruen is myd deme boldike vnd myt lichten vnd mit dren myssen, dar schal eyn jszlick broder to den dren myssen offeren syn eygen gelt by twen marck wasses.

Item jsset dat dar jenich ellende bedderue vth landesth man kümpt, de vnszer broderschap begerende is, de schal geuen eyne marck lubesch.

Item isset, dat eyn broder kompt hyr mit synen gude vppe ene weke sees na to Kopenhagen, is dat de bruder hulpe bedarff syn gudt vnnd syn lyff to bergende, dem schal eyn iszlich brodere helpen bergen syn gudt, wen em de olderlüde toseygen, by iiij mark wasses.

Item so schal de selschopp dre tydt jnnen dem jar to samende drincken, dat js to pinxsten, tho wynachten vnd to vastelauende, wo

I s.119

de brodere jn der stadt js vnd isset dat he des nicht en dot, so schal he syn halue beer schot vt geuen.

Item dar na, wen se gedrungken hebben, so scholen se begaen alle de genne, de dar vte der selschopp vorstoruen syn vnd alle cristene selen myt dren missen, dar schal eyn iszlich broder to iszlyker missen offeren syn egen gelt by twen margk wasses, wo he in der stadt js.

Item dar na schall men steuen holden, dar schal eyn iszlick broder by wesen by twen marck wasses.

Item dar nah to pinxsten, wen men steuen holt, so schal men olderlüde kesen van den kopmanne, enen van der Wyszmer, enen van dem Szunde, eynen vann Stettyn.

Item nemant schal dobelen in der kümpanye by iiij marck wasses.

Item nen broder schal sick laten dregen in de kumpanye spet ofte swert by iiij marck wasses.

Item so schal nenes broders knecht gan in de kumpanye, he en hebbe sunderlick werff to synen heren, by twe margk wasses.

Item we eynen vpstott maket in der kümpanige, wen se tosamende drincken, de schall der broderschopp geuen j lyspundt wasses.

Item so schal neyn broder eynen gast bringen in de kumpanie, he en hebbe orloff van den olderlüden, by twen marck wasses.

Item we ene bedderue vrouwe biddet in de kumpanige eynen gantzen dach, de schal gelden vor er iij wytte pennynge.

Item we biddet eyne jungkfruwen, de schal vor er gelden ij witte eynen gantzenn dach.

Item so wenne de olderlude seggen der kumpanyge, dat se gan scholen, so schal de selschopp meinlyken gan vnd de olderlüde se scholen nemen de slotene to deme kelre.

Item so welk broder vth vnser kumpanyge sick vor andert mit eynen vrouwen edder mit eynen jungfrouwen, de schall geuen der selschopp ene tonne dudessches beers, des glyken de gelerden, wan se prister werden.

Item isset dat eyn broder steruet hijr to Koppenhagen, sa scholen de olderlüde vte der broderschopp kesen viij, de ene bewaken scholen, by twee marck wasses.

Item so scholen de olderlude kesen viij brodere vthe vnser brodersehopp, de ene dregen to der kerken by twee marck wasses.

Item eme na to volgende to der kerken by enen Sk., sunder genade den de knecht to secht.

I s.120

Item so schall eyn iszlick broder stan by dem graue alszo lange, wente dat lik begrauen is, by ij marck wasses.

Item weret dat eneme brodere not an liggende, were we dar by were van synen broderen, de scholen eme helpen van der stede vth syner not.

Item weret dat eyn broder queme to by tyden vnd druncke in der selschopp, de scholde gelden na dach talen.

Item weret dat ein broder queme in de selschap vnd drungk eyns ofte tweye vnd bleue in der stadt vnd wolde denne nicht mer dringken in der kümpanyge, de schal gelden syn gantze beer schot.

Item so wan men holt meyne steuene, dat is drye in deme iare, isset dat denne jennich broder vpstot maket in der steuene vnd lopf vte der steuene sunder orloff der olderlüde vnd will nicht lik ofte rechte don, dat schal stan to den olderlüden vnd to de gantzen selschopp ofte se ene wedder in de selschopp nemen willen to eynen broder effte nicht.

Item so wan wy tosamene drincken, so schal men kesen twe schencken, de scholen schencken eynen dach, vnd were dat sake, dat eyne van den schencken dar neyn to sede vnd wolde nicht schenken, de scholde geuen ij marck wasses.

Item so en schal neyn man schenken ane de rechten schencken, by twee marck wasses, offte he hebbe dat in der olderlude orloff.

Item so schal neyn broder den anderen schuldigen vor neyme rechte he en hebbe ersten wesen vor den older lüden, is dat he dat dot, so schall he nicht also gudt man wesen in vnser selschopp, also he vor was vnd schal geuen j tonne beers.

Item weret dat eyn broder den andern wundede ofte sloge in der kumpanye, de sehal der kümpanye eyn lispundt wasses geuen sündern gnade vnnd j thonne beers.

Item so schall sich neyn broder na laten volgen in de kumpanye mer eynen knechte, by ij marck wasses.

Item so we eynen gast biddet in de kümpanye, weret dat de gast der kumpanige jenigen schaden dede, de den gast dar in gebeden hefft, de schal vor den gast antworden.

Item so schall men began, wen men steuene holden schall, alle cristene selen vnd alle de jenne, de vth vnser selschopp vorstoruen sint, ene tydt to vnser vrouwen vnd to der andere tydt to den moneken.

Item so scall nen broder den anderen todrincken by eynen verschen bekere vnd by eynen engelschen.

I s.121

Item js dat jenich broder vth vnser kümpanye steruet buten landes, den schall men began to den moniken mydt dren myssen, wen dat den olderluden to wetende worden js.

Item so welke broder in der kümpanye, wen se to samende drincken, also veel beers spildet, dat he dat mit syner handt nicht bedecken konde, de broder schal geuen enen engelschen.

Item wen de kopman, steuen holt, welk broder dem andern ouel sprekt, dat an syn ruchte vnd an syn ere geit, de schall der selschopp geuen to beteringe ene halue last beers.

Item so schall dat stan to der meynen kümpanye, ofte se ene wedder willen nemen to eynen brodere ofte nicht, dat hefft gewilkørt de kopman menliken to Kopenhagen to vastelauende in dem guldene jare.

Item so hefft de meyne kopman van der Wiszmer wilkort vnd ouerein gedregen jn dem gulden jare vppe Drakore in dem herueste, dat neyn kopman van der Wyszmer schall eynen anderen kopman van der Wyszmer nemen syne boden stede, wenne de dar lengest hefft gelegen uppe der boden stede, de schal by der boden stede bliuen, vnd schal dem anderen wedder geuen, wes em dat gekostet hefft, dat de uppe de bodenstede gebubet hefft, dit hefft de meyne kopman van der Wiszmere gewilkort to holdende by syner ere.

Item so en schall neyn broder dem anderen vorkop don, by ener tonnen beers.

Item so en schall neyn broder den anderen wynnen vte synen boden, id en sy syn wille, by eyner haluen last beers.

Item, so hefft de kopman meynliken onereyn gedregen, he sy van wannen he sy, dat neyn broder schall nemen syne boden stede, de dar to voren upgelegen hefft, effte dar ersten by gekamen isz by de bodenstede, by syner ere.

Slutningen fattes. Afskrift fra Frederik I's Tid i Geh. Ark

I s.122

<-Forrige . Indhold . Næste->

Opdateret: ons jul 31 20:23:05 CEST 2002
© eremit.dk 2001 - 2010 . Må frit anvendes og citeres med kildeangivelse
Kontakt:

Creative Commons License
Dette værk er licensieret under en Creative Commons Navngivelse-Ikke-kommerciel-Ingen bearbejdelser 2.5 Danmark Licens.

Valid HTML 4.01 Transitional  Valid CSS!
Sidens top